KALIBO, Aklan—Ginpasiguro it kapulisan nga magiging mas hugut ro pagpatuman nanda it pandemic protocols sa pihak nga ginbalik eon ro Aklan sa General Community Quarantine ukon GCQ umpisa ko Miyerkules nga adlaw, Setyembre 8, 2021.
Suno kay P/Capt. Benny Jones Mendoza, hepe it Banga municipal police station nga hugut nanda nga ginasunod ro quarantine protocols nga nakabaehag sa ginpaguwa nga executive order no. 22 ni Aklan governor Florencio Miraflores.
Gindugang pa ni Captain Mendoza nga dapat nga magsunod ro publiko sa ginapatuman nga sueundanan agud nga mapugngan ro pagkalhit it COVID-19 kapareho it pagsuksok it face masks ag face shields ag pagsunod sa social distancing ag curfew.
May nagakaigo sigon nga multa ro mga violators nga naga-abot sa 1,000 hasta 2,000 pesos ukon pagka-presu it hasta sa napueong adlaw.
Naka-schedule man sigon ro andang pag-release it travel pass kada barangay sa mga non-essential workers nga nagasueod sa banwa it Kalibo, kun sa siin 50 eamang nga katawo kada banwa ro ginapasugtan.
