KALIBO, Aklan—Naging madinaeag-on ro ginpatigayon nga Unity Walk ag Peace Covenant Signing it Banga Municipal Police Station para sa mga kandidatong magapasakop sa maabot nga Barangay ag Sangguniang Kabataan Elections 2023 nga ginpatigayon sa sueod it St. Joseph Spouse of the Blessed Virgin Mary church sa banwa it Banga, Setyembre 28, 2023.
Suno kay Police Executive Master Sergeant Jeric Dadivas, deputy chief for operations it Banga Municipal Police Station nga ro aktibidad hay ginpangunahan it mga tawuhan it Banga PNP sa idaeum it pagpamuno ni Police Captain Benny Jones Mendoza, Officer-In-Charge, kaibahan ro commission on elections ukon Comelec ag iba pang natungdan nga ahensiya it gobyerno kamana man ro mga kandidato it BSKE ag iba pa.
Ro aktibidad hay gin-umpisahan it sangka misa ag nagtapos sa pag angkon it candidates forum sa Teodosio’s Park and Cultural Complex.
Ginpadumdum sigon it comelec sa mga kandidato ro angot sa mga dapat ag indi dapat obrahon bago, samtang, ag pagkatapos it election period.
Hugut man nga gina-insister it mga otoridad nga maglikaw sa vote buying ag iba pang illegal nga butang.
Dugang pa ni Dadivas nga tuyo it aktibidad nga maangkon ro sangka Secure, Accurate, Fair, ag Free Barangay and Sangguniang Kabataan Elections 2023 kun sa siin madinaeag-on raya nga natapos nga may pageaum nga maangkon ro malinong ag paghiliusa para sa ikamayad it banwa it banga.
Nasayuran nga sa kabilugan nga 30 nga barangay sa nasambit nga banwa, may una nga 75 ro nagapa-ilihir nga punong barangay, 543 ro barangay kagawad, 68 ro SK chairman ag 421 ro SK kagawad.
