KALIBO, Aklan—Mabahoe ro naging pagpasaeamat it sangka working student matapos nga uman nga naibalik kana ro anang motorsiklo nga nauna eon nga gintakaw samtang naka-park sa sueod it gate it andang boarding house sa Barangay Bacan, Banga.
Suno kay Marvin Viray, tag-ana it motorsiklo nga domingo it agahon kat mataeupangdan nanda nga owa eon ro anang motor sa anang gina-parkingan kaibahan ro anang yabe.
Bangud sa pagkadismaya, owa eon suno kana imaw naka-agto sa simbahan kun siin imaw trabaho ag insigidang nagdangop sa banga municipal police station.
Bangud sa pagbueuligan it mga tawo kamana man sa pag-post nana sa social media, nakita ro anang motorsiklo nga gin-abandona sa likod nga parte it munisipyo it Banga.
Base sa CCTV footage it andang kaeapitbaeay, bandang alas-4:30 it agahon gintakaw ro motorsiklo it owa nakilaea nga persona bangud nga medyu malabo nga bo-oe it camera.
Ginpahayag dugang nga sang domingo antes nga natabu ro insidente, nataeupangdan nanda nga medyu may naga-libot-libot eon sa andang boarding house ag may kahigayunan nga may naghana nga magsueod sa andang gate.
Sa makaron hay nagbutang eon it lock sa gate ro tag-ana it boarding house ag gin-ayos ro andang CCTV camera.
Sa makaron hay nagapadayun ro imbestigasyon it pulisya sa insidente eabi eon ro pagtumod sa pagkatawo ukon identity it suspek.
Nasayuran nga eapnaag makaron ro motornapping ukon paeanakawan it motorsiklo sa banwa it Kalibo ag iba pang banwa sa Aklan.
