KALIBO, Aklan—May nagakaigo nga koordinasyon sa mga natungdan ro pag-rescue sa limang trabahador nga na-igpit sa ginapatuman nga enhanced community quarantine.
Suno kay Banga SB member Johnny Rentillo nga matapos nga magpangayo kana it bulig si Bernardito Navarra it Brgy. Cerrudo, Banga hay insigida imaw nga nakipag-angot kay Aklan 1st District Congressman Carlito Marquez.
Si Cong. Marquez sigon ro nakipag-transaksyon sa battalion commander it 12th Infantry Battalion ag Aklan Police Provincial Director nga sanda ro nakabantay sa border checkpoint.
Nakipag-angot man sigon si Cong. Marquez kay Governor Florencio Miraflores angot sa nasambit nga problema.
Sa pihak nga parte, gindugang pa it konsehal nga pilit man nanda nga gin-contact si Banga Mayor Erlinda Maming, apang indi raya matawagan bangud nga naka-home quarantine kamana man ro andang vice mayor bangud sa andang pagbiyahe sa Luzon.
Bilang opisyal suno kana it banwa hay nagdesisyon imaw nga gamiton ro andang ambulansiya bangud nga ro igasakay kara hay ro mga igapaidaeum sa quarantine.
Mag-eowas suno kana sa suksok nga face mask hay may bitbit nga nagakaigo nga dokumento ro mga raya ag quarantine pass.
Hugut man sigon nanda nga gina-practice ro social distancing sa sueod it saeakyan.
Sa pihak nga parte, nagpanindugan ro opisyal nga haum imaw nga atubangon ro mga kritisismo kana, kun sa siin, ro anang pinaka-intensyon hay mabuligan ro anang mga kasimanwa.
Hantop man sigon sa tagipusuon ro anang pagpangayo it pasaylo sa tanan nga mga taga-Banga nga owa nagustuhan ro anang naging aksyon nga makabig sigon nga pag-eabag sa ginpaguwa nga Executive Order No. 20 ni Gov. Miraflores.
Nagtuga it alarma ag panic ro insidente bangud nga ro Iloilo hay nakalista eon it 2 kasong it COVID-19 ag ro Capiz hay may sangka kaso eon man.
