KALIBO, Aklan—Ginaeauman nga magiging three-cornered fight ro engkwentruhanay sa pagka-mayor sa banwa it Malay sa 2022 elections.
Mag-eowas sa siguradong kandidatura ni malay acting mayor Frolibar Bautista sa idaeum it Tibyog Akean, nagakalhit man ro balita nga magapa-ilihir si Marlyn Gregorio Villaresis, dating kagawad it barangay Yapak.
Matunog man ro pangaean ni Yapak punong barangay Hector Casidsid nga magasabak sa mayoralty race it nasambit nga banwa.
Samtang, ginaeauman nga magiging ka-tandem ni Bautista si acting Vice mayor Niño Carlos Cawaling, unga ni dating mayor Ceciron Cawaling samtang magiging vice mayor ni kagawad Villaresis si Manoc-manoc barangay captain Nixon Sualog.
Mabahoe man ro pagpati nga eubusan eon nga maga-back-out sa nasambit nga posisyon ro mga dating matunog nga pangaean nga sanday dating vice Mayor Abram Sualog ag dating Mayor John Yap.
Madumduman nga si Bautista hay nagdaog bilang vice mayor kontra kanday Abram Sualog ag Eliberto Daguno ko 2019 eleksyon.
Ginbutang imaw bilang acting mayor kasunod it pagpatalsik sa pwesto kay Ceciron Cawaling it Office of the Ombudsman.
Nagdaog si Cawaling kontra kanday Yap ag Rodgiet Ranara ko nagtaliwan nga eleksyon samtang ro anang unga nga si Niño Carlos hay nagpanguna sa mga nagdaog nga konsehal.
