Naiuli eon sa India ro bangkay it 45 trabahante nga mga Indian nationals nga namatay sa nasunog nga residential building sa Mangaf city, Kuwait.
Nauna eon nga ginpahayag it Kuwaiti authorities nga kapin sa 50 katawo ro namatay sa sunog nga ginakaeakipan it 45 halin sa India, 3 halin sa Pilipinas samtang 2 pa ro uwa natumod.
Suno kay Indian Minister Kirti Vardhan Singh nga personal nga nag-adto sa Kuwait matapos ro insidente, nagpatigayon eon it DNA tests para matumod ro pagkakilaea it mga biktima.
Kaibahan sa mga trabahanteng Indian national nga nakumpirmang namatay hay 23 naghalin sa Kerala state, 7 halin sa Tamil Nadu, tig-3 halin sa Andhra Pradesh ag Uttar Pradesh, 2 halin sa Odisha ag tig-sambilog halin sa Bihar, Punjab, Karnataka, Maharashtra, West Bengal, Jharkhand ag Haryana.
Suno sa Indian Minister, inareglo it Indian government ro sangka special Air Force flight para maiuli ro bangkay it mga namatay nandang kababayan.
Naghugpa raya sa Kochi city it Kerala antes nga gindaea sa Delhi.
Kapin sa dose-dosena man nga trabahador nga kaeabanan hay Indian national ro naninahan sa sunog.
Samtang, gin-anunsiyo it state ag federal governments nga magatao sanda it kompensasyon sa naulilang pamilya it mga namatay sa sunog.
