KALIBO, Aklan—Kumbinsido ro pamilya ni Nida Pronton, 36-anyos ag residente it Barangay Jugas, New Washington, Aklan nga uwa it foul play sa anang kamatayon kung sa siin nasapwan eon lang raya nga uwa eon it kabuhi sa Aklan river nga sakop it Barangay Tinigaw, Kalibo, Aklan.
Suno sa ina kara nga si Nena Pronton, mahugod ro anang unga ag masami raya nga nagatipon it kahoy agud nga may andang panggatong.
Nakahiligan eon sigon it biktima nga magpinanaw maskin siin apang gilayon man raya nga naga-uli hasta ko ulihi nga nasanay eon man sanda.
Ginpahayag dugang nga posibling nagbaeon it eambong ro anang onga bangud nga iba eon ro suksok kara pagkakita kana sa nasambitang lugar.
Madumduman nga nakit-an eon lang nga nagahamyangon sa nasambitang suba si Pronton bandang alas-5:00 it hapon ko adlaw it Nobyembre 2 it mga onga nga nagapanglambat.
