TANGALAN, Aklan — Nasapwan nga naga-eutaw-eutaw ro bangkay it sangka eaeaki sa dagat nga sakop it Purok 4, Brgy. Baybay, Tangalan, pasado alas 10:00 it agahon it Miyerkules, Setyembre 24.
Sa pagberipika, ro biktima hay nakilaea kay Mickey Portes, sa legal nga edad ag residente it Brgy. Laguinbanua West, Numancia.
Ginasugid nga raya hay sangka PWD, kun sa siin, nabudlayan raya sa maghambae.
Suno kay Nico James Raba nga pagkatapos nga mag-break time sa andang trabaho hay nakita nanda it anang kaibahan nga construction worker ro bangkay nga naga-eutaw-eutaw.
Apang alas-6:00 pa eamang it agahon hay nakita eon sigon nanda raya apang ginbalewala bangud nga indi masiguro kon raya hay tawo.
Gin-agtunan sigon nanda raya ag gin-guyod ro anang eawas sa bibi it baybay ag pagkatapos hay gin-report sa andang project engineer nga nagdangop man sa barangay.
Ro biktima hay nakasuksok it itom nga t-shirt ag itom man nga shorts nga may nakasukbit nga plastic bottle.
Nico James Raba, construction worker nga nakakita sa bangkay
Samtang, ginpahayag ni P/Capt. Moonyen de Joseph, hepe it Tangalan Municipal Police Station nga makaron hay padayun pa ro andang ginahimo nga imbestigasyun partikular kon ham-an nga naka-abot raya sa nasambit nga lugar.
Sa pag-usisa hay nagapamakod eon ro anang eawas ag owa man it nakita nga anuman nga lastro.
Ginahueat pa sigon nanda ro desisyon it pamilya kon igapaidaeum raya sa autopsy examination agud nga matumod ro anang cause of death.
P/Capt Moonyen de Joseph, hepe it Tangalan Municipal Police Station
