KALIBO, Aklan–Nakilaea eon ro eaeaki nga naeumos kahapon sa kaeawran nga sakop it Rizal Street, barangay Poblacion, New Washington kadungan sa selebrasyon it kapiestahan ni San Juan de Bautista.
Personal nga nag-agto sa New Washington police station si Silverio Dela Cruz agud nga kumpirmahon ro pagkatawo it biktima nga si Ricardo Rafols, alyas Cardo, 67 anyos ag naga-istar sa andang baeay.
Suno kana nga bangud man sa kahilungon rason nga owa eagi imaw naka-report sa kapulisan kahapon.
Bag-o eamang suno kana nga nakabaton it pension halin sa senior citizen ro biktima ag posibleng nakipag-inuman sa anang mga kabarkada ag pagkatapos nga mahilong hay nagpaligos sa dagat.
Gusto man nanda nga ipaidaeum sa post mortem examination ro bangkay it biktima agud nga mausisa ro physical nga sitwasyon it bangkay ag matumod ro posibleng gintunaan it anang kamatayon.
