KALIBO, Aklan — Padayun ro imbestigasyon it pulisya sa pagpatay sa sangka 23-anyos nga babaye nga nasapwan nga hubeas ro bangkay sa kilid it kanae it irigasyon sa Sitio Tabiling, Brgy. Mataphao, New Washington.
Ro biktimang si Jennifer Zaulda, may sangka unga ag residente it nasambit nga lugar hay ulihing nakita sa birthday party it Sangguniang Kabataan ukon SK chairman nga si Kenny Reynaldo kabi-i antes imaw nga nasapwan nga owa eon it kabuhi.
Nakita nga nagahapa ag naga-eutaw sa tubi it irrigation canal, may nina sa dahi ag owa it suksok nga eambong si Zaulda .
Ginadudahan it mga otoridad nga ginhimuslan ro biktima antes nga pinatay .
Ginpahayag ni Mataphao Barangay Captain Alita Sineneng nga base sa anang pagpatigayon it kaugalingon nga imbestigasyon, nag-agto sa birthday party ro biktima kaibahan ro anang magueang nga babaye , apang nagbueag sanda bandang alas-3:00 it aga-aga kat mag-agto raya sa Poblacion Banga kaibahan ro SK chairman bangud nga may ginbakae.
Ginasugid nga si Rockson Roque alyas “Bombay”, residente it nasambit nga lugar ro kaibahan it biktima antes raya nga naduea ag nasapwan nga patay eon .
Si alyas Bombay ro ginaturo makaron nga person of interest sa krimen it New Washingtong Police Station.
