KALIBO, Aklan—Bangkay eon kat makita kaina it agahon ro sangka mangingisda nga naduea umpisa ko Sabado it gabi-i sa kaeawran nga sakop it Masbate ag Capiz matapos nga gina alegar nga gin banggaan it sangka barko ro andang ginasakyan nga baroto.
Nakilaea ro nabo-oe nga bangkay nga si Rex “alyas Ricky” Peralta, 54 anyos, residente it Barangay Bakhaw Norte, Kalibo.
Suno kay kagawad Nelson Dela Cruz nga ko domingo it agahon, nagpaeawod ro mga taga MRDRRMO Kalibo, Philippine Coast Guard ag iba pang grupo it mga rescuer agud nga usuyon ro naduea nga mangingisda.
Sakay it sangka baroto, nag-abot ro bangkay it biktima sa bibi it baybayon nga sakop it Barangay Bakhaw Sur, Kalibo kaina.
Nakita ro bangkay nga naga-eutaw-eutaw sa kaeawran nga sakop it Sibuyan ag Masbate nga ko ulihi hay gindagsa eon ag narekober sa kaeawran it banwa it Tangalan.
Nasayuran nga nakaeowas ro daywa kara nga kaibahan nga sanday Gerald Retos ag Leo Arilas, parehong residente it Sitio Pigado sa nasambit nga barangay.
Naeowas sanda it mga kaparehong mangingisda nga taga Roxas City ag ginhatud pauli.
Natabu ro insidente matapos nga magpaeawod sanda ko Mayo 8 it hapon sakay it barotong “John Ruel.”
Apang pasado alas-12:00 it ko aga-aga eon it domingo samtang nga naga-uean hay ginbungguan sanda it sangka barkong may kargang mga kahoy rason nga naputoe ro likod nga portion it baroto ag kumueob.
Ginasugid nga nag-eueumpat ro mga mangingisda kat makita nanda nga nagapaeapit eon ro barko.
Gintinguhaan pa sigon it namatay nga si Rex nga pahayagan it flashlight ro barko apang ulihi eon ro tanan.
