NATIONAL News — Nag-abot eon sa Pilipinas, adlaw it Biyernes, Pebrero 21, 2025, ro bangkay ni Pulis Koronel Pergentino Malabed Jr., nga namatay sa mid-air collision sa Washington, D.C.
Sambilog imaw sa 67 nga biktima it bumunggo nga sangka eroplanong pangkomersyal it American Airlines sa sangka Black Hawk helicopter it militar it U.S. maeapit sa Reagan National Airport ko Enero 29.
Sa opisyal nga biyahe si Malabed para sa pre-delivery inspection it mga vest para sa PNP.
Naghalin imaw it Pilipinas ko Enero 22 para sa inspeksyon sa India antes nga nag-agto sa U.S. agud nga usisaon ro mga vest.
Nakataeana kunta imaw nga makipagpueong sa Police Attaché sa Washington, D.C., kat matabu ro trahedya.
Nagpatigayon ro PNP it mga seremonya bilang pagtau it pasidungog sa anang serbisyo, kaibahan ro arrival honors sa NAIA, sangka vigil sa Camp Crame, ag necrological service.
Ro anang eubong hay nakataeana sa Pebrero 27 sa Memorial Gardens, Sta. Rosa City, Laguna.
Ginpasiguro ni PNP Chief Gen. Rommel Francisco Marbil ro suporta para sa anang pamilya ag ginakilaea ro dedikasyon ni Malabed sa serbisyo.
Makabaton ro anang pamilya it masobra sa ₱2,698,140 halin sa PSMBFI ag iba pang insurance benefits.
