KALIBO, Aklan—Nakataeanang iga-uli sa Pilipinas ro bangkay it sangka Aklanon Overseas Filipino Worker ukon OFW sa Libya.
Base sa pahayag it Philippine Embassy sa Tripoli, nakikipag angot eon sanda sa Umm Ar Rizam General Hospital ag sa pamilya kara sa banwa it Libacao bilang pagpahaum sa pag-uli it eawas ni Maria Teresa Orbista Teodosio.
Si Teodosio hay binawian it anang hueam nga kabuhi biyernes it agahon sa gina-obrahan nga ospital sa edad nga 60.
Imaw hay nagtrabaho bilang midwife sa nasambit man nga ospital umpisa ko 2018.
Dag-on 2002 kat una raya nga nagtrabaho sa Libya.
Gin-aywan kara ro anang asawang si Libacao Sangguniang Bayan member Bennette Teodosio, ag ro andang ap-at nga mga unga.
Ro embahada it Pilipinas sa Libya hay nagapaabot it andang kasubo ag pakikisimpatiya sa naaywan kara nga pamilya.
