KALIBO, Aklan—Matapos ro haeos tatlong adlaw nga pag-usoy umpisa ko biyernes nga adlaw, nakitang naga-eutaw-eutaw sa suba ro bangkay it sangka eaeaki nga gina-alegar nga nag-eumpat sa tulay sa aklan river nga sakop it Purok 4, C. Laserna St., Kalibo.
Nag-eutaw ro bangkay it biktimang si Rod Relator sa suba nga sakop it Brgy. Bakhaw Sur, Kalibo maeapit sa dumping site ag nakita mismo raya it anang magueang nga si Allan Relator nga nagbulig sa pag-usoy sa anang manghud kasunod it pagpabatyag it biktima pinaagi sa pagpadamgo it anang ginakahimtangan.
Ginasugid nga hanang-it raya sa timon it nakadungka nga baroto sa nasambit nga lugar.
Nasapwan raya nga owa it t-shirt ag nakasaewae it maong.
Base sa report, nakaangkon it owa pagka-ilintindihan ro biktima ag ro anang magueang nga si allan matapos nga gina-alegar nga ginsita sa pagbarter kara sa anang tatlong alagang manok nga ginaeakipan it daywang ka munga ag sambilog nga dirasa sa native nga manok.
Bangud kara, nag-agto raya sa anang barkadang si Jeoffrey Valencia, 28-anyos, residente it Purok 4, C laserna st kalibo ag nakipag-inuman.
Apang matapos sigon nga mahilong hay nag-eumpat raya sa tulay.
Gintinguhaan pa sigon raya nga salbaron it anang mga kainuman apang owa eon raya nakabutwa sa tubi bangud sa mataas ag mabaskog nga sueog tuga it pag-uean-uean.
