KALIBO, Aklan—Matapos nga anuron ag maeumos sa nagaragasa nga Aklan river nga sakop it Purok 1, C. Laserna St., Kalibo ko Miyerkules it hapon, bangkay eon kat makit-an ro sangka siyam nga dag-on nga ungang babaye sa barangay Old Buswang, Kalibo maeapit sa may Bakhawan Eco-Park.
Nasayuran nga ro biktimang si Kyla Rome, residente it nasambit nga lugar kaibahan ro anang igkampod nga pitong dag-on hay nag-agto sa estaka agud nga maghugas it siki.
Apang ginasugid nga aksidenteng nadanlog ro unga kat ginhana nga eagson ro anang nahueog nga tsinelas sa tubi.
Ro insidente hay naboe-an pa it CCTV footage.
Suno kay Punong Barangay Edmund “Idol” Dela Cruz it Old Buswang, Kalibo, daywang auxiliary it Philippine Coast Guard nga kaibahan sa operasyon ro nakakita sa bangkay nga sumang-it sa kahoy ag naka-kueob sa bibi it baybay.
Nasayuran nga naging mabudlay ro pagpatigayon it search and rescue operation it MDRRMO-Kalibo ag iba pang natungdan nga ahensiya it gobyerno ko nagtaliwan nga mga inadlaw bangud sa mabaskog nga sueog it tubi tuga it naexperiensiyahan nga LPA.
Ro bangkay it unga hay gindaea eon sa sangka punerarya.
Haeos indi man mabaton it ina ro nabatu bangud nga naga-isaeahanon eamang nana raya nga unga ag daywa eon lang sanda nga nagapangabuhi.
