KALIBO, AKLAN — Nag abot eon sa Aklan ro bangkay it 31-anyos nga volunteer doctor nga binaril-patay halin sa sangka medical mission sa Kapatagan, Lanao del Norte.
Ginsakay sa C-130 military plane ro patay nga eawas ni Dr. Dreyfuss Perlas, residente it Poblacion, Batan, Aklan nga nag abot sa Kalibo International Airport kaina it hapon.
Suno kay Batan Sangguniang Bayan member Dennis Perlas, ama ni Dr. Perlas nga nabatyagan nanda ro pagpalangga it mga residente it Sapad ag kaiping nga banwa bangud sa buhos ro nakibuylog sa lamay it anang unga sa sangka funeral parlor sa Lanao del Norte kabie kamana man ro suporta it mga opisyal idtu nga nagtaeana it reward money para sa pagkaaresto sa suspek.
Madumduman nga binaril-patay si Dr. Perlas samtang nakasakay it anang motorsiklo bandang alas-7:30 it gabie halin sa sangka medical mission kaibahan ro 15th Infantry Batallion pauli sa gina upahang baeay sa Brgy. Maranding, Lala.
Handum sa makaron it anang mga kapamilya ag kaibahan sa trabaho ro hustisya sa pagkamatay it sangka mabuot ag mahugod nga volunteer doctor.
Si Dr. Perlas hay kaibahan sa 30th batch it “Doctor to the Barrio” program it Department of Health ag na-assign sa nasambitang lugar.
