KALIBO, Aklan—Uman nga nagpaandam sa publiko ro Bangko Sentral ng Pilipinas ukon (BSP-Roxas) kontra sa mga peke nga kwarta nga amat-amat eon nga nagakalhit makaron bangud man sa Christmas rush ag pagpamakae it mga pumueuyu it mga panghanda ag pang regalo para sa paskwa.
Ginlaygayan ni Ma. Cristina del Rosario, Senior Research Specialists it BSP Roxas ro publiko nga usisaon it mayad ro mga mabaton nga kwartang papel agud nga masigurado nga bukon it peke ro mga raya.
Pwede suno kana nga usisaon ro kwarta pinaagi sa “Feel-Look-Tilt” method.
Ro feel hay ro pagsalat sa kwartang papel nga dapat hay magaeas bangid sa ginamit nga materyales kara ag ro mga naka-embossed nga imprenta samtang ro look man hay ro pag-usoy it mga security feature it kwarta kapareho it embossed print, watermark, security fibers, asymmetric serial numbers ag mga see-through mark kara nga mabulay nga mapeke.
Samtang, gindugang pa ni del Rosario nga raya man ro rason kon ham-an nga gindugangan it special features ro bag-ong polymer ukon plastic nga kwarta nga nakataeanang igapaguwa sa masunod nga dag-on.
Ro tilt man hay ro pagbalikwas sa kwarta agud nga usuyon ro nakatago nga value kara nga nagiging visible kon ro banknote hay ginapatiyog it 45 degrees ag ginatikwas.
Gina engganyo man nana ro pupliko nga kun engkasong makakita it mga pekeng kwarta ukon nagaduda kon matuod ukon peke hay pwedeng mag agto sa mga banko ag ipakita raya agud nga mausisa.
