KALIBO, Aklan–Nag-angkon it lastro sa tiyan ro sangka eaeaki matapos nga ginbuno it anang kasimaryo bandang alas-6:00 kabi-i sa Sitio Ilawod, Brgy. Castillo, Makato.
Nakilaea ro biktima nga si Manuel Tiaña samtang ro suspek hay nakilaea kay Rio Dado parehong residente it nasambit nga lugar.
Base sa inisyal nga imbestigasyon it Makato Municipal Police Station nga nag-inuman ro daywa sa panimaeay it igkampod it suspek.
Samtang naga-inuman hay nakaangkon sigon sanda it mainitan nga diskusyon bangud eamang sa bagungon.
Ginasugid nga gin-eapog it biktima it bagungon ro igkampod it suspek.
Matapos ro diskusyon hay nagdisider sigon ro biktima nga mag-uli apang ginsundan raya it suspek.
Kung siin, nagbuoe it kahoy ro biktima ag ginbunae sa suspek nga naging rason it anang pagkatumba.
Sa uman sigon kara nga paghana hay insigidang nagabot it siyaw ro suspek ag ginbuno sa tiyan ro biktima.
Insigida man nga gindaea sa Aklan Provincial Hospital ro biktima para sa nagakaigo nga pagbueong samtang ro suspek hay boluntaryo nga nagsurrender sa mga otoridad.
