KALIBO, Aklan—Bangud sa paeag it coronavirus disease ukon COVID-19, padayun ro pagbagsak it numero it tourist arrivals sa isla it Boracay.
Suno kay Malay mayor Frolibar Bautista nga naga-average eon lang makaron sa 12% ro naga-abot nga mga dumueuong nga turista.
Mabahoe ro naging epekto kara sa pagkaduea it mga Chinese ag Korean tourists kasunod it ginpaguwa nga travel ban it gobyerno.
Sa pihak nga parte, padayun pa sigon ro pagbuhos it mga filipino tourists sa isla.
Ginpahayag ni mayor Bautista nga ro domestic tourists eon lang ro nagabuhi makaron sa isla.
Apang ginaeauman nga mabawasan man raya sa ulihing mga inadlaw eabi pa ag nakalista eon ro Department of Health (DOH) it kaso it local transmissions it makamaeatay nga virus.
Bangud kara, bumagsak eon sigon it haeos 55 porsiyento ro kabilugan nga kita sa Boracay.
Kaibahan sa apektado hay ro andang koleksyon sa environmental ag terminal fee.
Sa pihak nga parte, gindugang pa ni mayor Bautista nga naka-alalay makaron ro Department of Labor and Employment (DOLE) sa mga apektadong trabahador sa isla.
Ginlaygayan sigon it DOLE ro mga establisimento ag iba pang negosyo nga ipatuman ro flexible working arrangements kaysa pahalinon sa serbisyo ro mga empleyado ukon eubusan nga magsarado.
