KALIBO, Aklan—Nagnaba sa 7.5 percent maghalin sa 9.1 percent nga nairecord ko January 2021 ag 13.7 percent ko April 2020 ukon katumbas it 253, 484 ro numero it mga owa it trabaho sa bilog nga Western Visayas sa pihak it ginapatuman it gobyerno nga mas hugot nga quarantine restrictions bangud sa paglobo it kaso it COVID-19, base sa datos it Philippine Statistics Authority (PSA).
Samtang, ginpahayag ni Peter Mangilog, Statistician II it Philippine Statistic Authority (PSA) -Aklan nga nagtaas man sa 21.6 percent ukon katumbas it 729,999 ro una sa status nga underemployment ko buean it Abril kung sa siin mas mataas raya kumpara sa 21.1 percent ukon 725, 548 nga nailista ko buean it Enero.
Nasayuran nga base sa datos nga nailista sa bilog nga nasyon, mas pang nag-abo ro numero it mga Pilipino nga nadueaan it trabaho ko buean it Abril tuga it ginapatuman nga mga quarantine restrictions.
Sa bilog nga nasyon, nakalista it 8.7% nga unemployment rate sa mga residente nga may edad 15 pataas, nga mas mataas ko buean it March nga nag-abot eamang sa 7.1%.
Nagapakita eamang raya nga kapin sa 4.14 milyong Pilipino eun ro owa it trabaho umpisa sa dating 3.44 million.
Mas maabo man ro numero it mga empleyadong mas ginapili ro mga trabahong nagatao it mas mataas nga sweldo maskin nga mas manaba raya sa andang kwalipikasyon.
Base sa datos, ro underemployment hay naga-abot it 17.2% maghalin sa 16.2 ko buean it March.
