KALIBO, Aklan—Bangud sa padayun nga epekto it Coronavirus Disease ukon COVID-19 pandemic, mas pang nadugangan ro numero it mga indibidwal nga nawad-an it trabaho sa probinsya it Aklan ag bilog nga Western Visayas.
Suno kay Peter Mangilog it Philippine Statistic Authority (PSA) Aklan, nag-abot eon sa 13.7% ukon katumbas it 417, 319 ro nailistang unemployment rate sa bilog nga rehiyon base sa andang ginpatigayun nga region wide survey ko buean it Abril.
Mas mataas sigon raya kumpara sa numero nga nailista it ahensya sa kaparehong period ko nagtaliwan nga dag-on.
Raya hay bangud nga maabo sigon nga apektadong industriya umpisa nga nagpanaeasa ro COVID-19 sa nasyon.
Kaeabanan sigon nga naapektuhan hay ro mga sa agriculture, manufacturing ag services sector kung siin kaibahan eon kara ro mga hotel, restaurants ag commercial establishment bangud kaabuan sa mga raya hay nagsarado.
Samtang, sa pihak nga parte, ginpaathag ni Mangilog nga tumugpa eon sa 2.6 percent ro inflation rate sa probinsya it Aklan ko buean it Hulyo.
Raya hay tuga it pagtaas sa mga presyo it serbisyo, baeak-eunon ag ibang nagapangunang kinahang-eanon.
