KALIBO,Aklan– Emosyunal ro pamilya it sangka 24 anyos nga eaeaki matapos raya nga masapwan nga nakabigti sa sueod it 3rd floor it baeay it anang lola bandang alas-9 kabi-i sa Rizal St. Barangay Poblacion Banga.
Ginapatihan nga bangud sa depression tuga it family problema rason nga nahimo it biktima nga owa eon ginpangaeanan nga wakasan ro anang kabuhi.
Base sa panaysayon it anang lola, pagkabukas sa third floor it baeay hay nakita ro biktima nga nakabigti it eubid sa railing it hagdan.
Nagkabaeaka sigon sanda bangud nga maskin nga ginatawagan ag gin-message sa anang social media hay owa raya nagasabat.
Ginpahayag dugang nga owa nanda raya nakitaan it anuman nga problema bangud sa pagiging masinadyahon kara nga klase it tawo.
Nasayuran nga antes ro insidente hay nakasugid raya sa anang kabarkada nga gin-block nana ro anang ina sa social media nga presenteng nagatrabaho sa abroad.
Halin raya sa broken family kun sa siin ro anang ama hay may iba eon nga pamilya.
Eubus nga nagakanugon ro pamilya ag amigo it biktima bangud nga nagtapos raya nga cum laude sa Aklan State University sa kursong business administration ko nagtaliwan nga dag-on ag manugsueod sa banko nga gin aplayan.
Daywa sanda nga magmaeanghud kun sa siin ro anang magueang hay presente nga nagatrabaho sa sangka cruise ship.
Sa pag-imbestiga it Banga Municipal Police Station ag SOCO, owa man it foul play sa insidente ag owa man it nakita nga anuman nga suicide note.
Samtang kung may problema ka ag gusto mo it kaistorya,puwedi kang tumawag sa:National Center for Mental Health Crisis Hotline (NCMH-USAP) sa 0917-899-USAP (8727) ukon sa 7-989-USAP (8727).
Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart), 2919 (toll-free for Globe and TM).
