Makaron nga domingo, ginaeauman nga maga-grabe pa ro heatwave ag maga-abot sa 40 degrees Celsius ro temperatura sa United Kingdom.
Bangud kara, gin-anunsyo it cinema chain nga Showcase nga ro mga redheads ukon tawong puea ro buhok hay libreng makatan-aw it pelikula sa tanan nanda nga branches sa U.K. makaron nga adlaw Hulyo 19 ag 20.
Natukiban sa sangka pagtuon nga sobrang sensitibo ag mas delikado ro panit it mga redheads sa init it adlaw.
Suno sa sangka research, ro mga redheads ro may mas mabahoe ro tsansa nga makaangkon it skin cancer kon magbabad sa adlaw nga owa it anuman nga proteksiyon halin sa UV rays.
Suno sa general manager it Showcase Cinemas nga si Mark Barlow, gin-obra nanda ro promo sa andang mga sinehan agud nga maging eowas ro mga redhead sa grabeng init it adlaw daea it heatwave.
