KALIBO, Aklan—Bangud sa kakueangan it nagahakot nga mga garbage truck rason nga atrasado ro pagkolekta it mga nakatambak nga basura sa pilang parte it Isla it Boracay.
Raya ro ginpahayag ni Elena Tosco Brugger, Advisory Council Chairman it Philippine Chamber of Commerce and Industry ukon PCCI-Boracay.
Apang natigayon eon suno kana nga naresolba ro andang gina-reklamo nga nakatambak nga basura nga andang nakolekta sa ginpatigayon nga paglimpyo kadungan it pagdumdum sa International Coastal Clean up sa Sitio Diniwid, Brgy. Balabag, Boracay.
Matapos sigon nga gin-post nana raya sa social media hay insigida man nga gin-aksyunan it Solid Waste Management it lokal nga gobyerno it Malay ro nasambit nga problema.
Ginrason sigon it LGU nga pila eamang ro andang naga-gana nga garbage truck makaron.
Gin-insister ni Brugger nga eye sore ro mga nakatambak nga basura sa mga turista.
Tiempo eon suno kana nga makaangkon eon it dugang nga material recovery facility ukon MRF sa isla.
Ginrekomenda pa nana sa mga barangay council, mga residente ag mga negosyante nga hugut nga ipatuman ro waste segregation.
Importante suno kana nga matutukan ro waste segregation halin sa ginhalinan kara ukon ginatawag nga segregation at source para maging epektibo ro pagkolekta ag pagpilak sa mga basura.
Ginaduso man nana nga mapatuman ro RA 9003 ukon Ecological Solid Waste Management Act of 2000 sa Boracay ag bilog nga mainland Malay bangud nga kon naga abu ro turista hay naga-abu man ro basura.
Kaabuan sa mga basura nga natipon sa isla hay halin sa kitchen waste ag garden waste it mga kaean-an ag resort.
Apang kon habagat season suno kana hay maabu nga basura nga naghalin sa kaiping nga mga banwa ro ginadagsa sa bibi it baybayon.
Base sa patakaran, ro mga basurang nakolekta sa boracay hay ginahakot it truck ag ginasakay sa barge paagto sa mainland Malay.
Nagaeaum man imaw nga matigayon ro partnership sa tunga it LGU-Malay, stakeholders, business sector ag Mother Earth Foundation agud nga maresolba ro problema sa Isla paagto sa handum nga maging model it sustainable tourism island.
