KALIBO, Aklan—Bangud sa landslide victory sa bag-o eamang natapos nga eleksyon, ginpromisa ni re-elected 2nd District Representative Ted Haresco nga paga-doblehon pa ro anang pagtrabaho.
Suno kana nga makaron nga tapos eon ro eleksyon, tiempo eon man agud nga magserbisyo sa panibag-ong tatlong dag-on nga mandato nga gintau kana it publiko.
Mas pa sigon nana nga pagadugangan ro mga naumpisahang proyektong pang imprastraktura, edukasyon, livelihood, ikamayad nga eawas ag iba.
Pinaagi sa pagbueuligan nanda ni governor elect Joen Miraflores, eauman sigon ro andang pagpatindog it mga bag-ong ospital eabi eon sa banwa it Malay, rehabilitasyon ag upgrading it Ibajay hospital kamana man ro pagdugang it mga doktor sa Aklan provincial hospital.
Samtang, bangud sa pagbulig sa oras it pagkinahangean rason nga nakalista sigon it kasaysayan ro andang partido nga Tibyog Akean matapos nga halin sa provincial level paagto sa ubos hay puro mga kandidato nanda ro nagmadinaeag-on sa katatapos nga eleksyon.
Samtang, nakadepende suno kana sa masunod nga house speaker kon igapabilin imaw sa anang dating ginabuytan bilang vice chairman it committee on appropriations.
Owa man nakalipatan ni congressman ted nga i-congratulate ro anang suod nga amigo ag dating kaklase nga si presumptive president Bongbong Marcos.
Ginaeauman nga magiging maayos ro andang working relationship.
