KALIBO, Aklan — Sa kustodiya eon it mga otoridad ro sangka 17-anyos nga suspek nga nagbuno-patay sa anang igkampod bandang alas-9:00 it gabi-i sa Brgy. Dalipdip, Altavas, Aklan.
Suno kay P/Capt. Ronald Paclibar, hepe it Altavas Police Station, boluntaryong nagsurender ro suspek sa mga pulis nga naka-assign sa sangka polling center sa nasambit nga banwa.
Ginkilea ro biktima nga si Agosto Cesar de Pedro, 29, residente it Brgy. Cabugao, Batan.
Base sa report, nag-ugat ro insidente matapos nga magpamalibad ro suspek nga sundon ro mandu it anang igkampod nga si de Pedro nga magbakae it aeak bangud sa kahadlok nga madakpan sa ginapatuman nga liquor ban para sa mid-term election.
Nag-gabot sigon it kutsilyo ro biktima, apang naagaw raya it suspek ag ginbuno sa anang igkampod nga tinamaan sa anang tiyan.
Gin-insister pa it suspek nga self-defense eang ro anang ginhimo.
