KALIBO, Aklan—Ginaengganyo makaron it Sangguniang Bayan (SB) it Malay ro lokal nga gobyerno nga insigidang aksyunan ro mga pasaway nga tag-iya it mga establisimento nga padayong naga-eabag sa ginapatumang ordinansa may kaangtanan sa coastal easement ag road setbacks sa isla it Boracay.
Raya hay kasunod it pagtumod it Boracay Inter-Agency Rehabilitation Management Group (BIARMG) sa 10 establisimentong nag-eabag sa gintaeanang 25+5 meter easement rule sa baybayon ag 6 meters nga road easement halin sa tunga it karsada.
Gintaw-an ro mga raya it 15 diyas nga palugit agud kakason ro mga iligal nga istraktura.
Mag-eowas kara, pilang establisimento sa isla ro padayon nga naga-operate maskin uwa it nagakaigong business permits ag clearances kat uman nga buksan ro Boracay may ap-at nga buean eon nga nakataliwan.
Sa ginpatigayong regular session it SB, pilang konsehal ro nagpaabot it kabaeaka sa posibleng ginbunga kara sa ulihi.
Mag-eowas sigon sa pagkadaeahig sa kaso hay may posibilidad eoman nga mapasarado it uman ro Boracay bangud sa mga establisimento nga uwa nagasunod sa sueondanan.
Nasayuran nga ro isla nga sambilog sa mga nagapangunang tourist destinations sa nasyon hay ginpasarado ko Abril 26, 2018 bangud sa naglala nga polusyon ag uman nga nabuksan ko Oktubre 26, 2018.
Ginkasuhan man ko nagtaliwan nga dag-on it Department of Interior and Local Government (DILG) ro mga opisyal it LGU-Malay bangud sigon sa pagpabaya.
Nagapadayon hasta sa makaron ro rehabilitasyon ag paglimpyo sa isla.
