KALIBO, Aklan—Ginapatihan nga bangud sa nag-overheat nga electric fan ro naging rason it pagkasunog it sangka panimaeay sa Purok 1 Brgy. San Jose, Ibajay, Aklan.
Suno kay FO1 Raymund Lucy, arson investigator it Bureau of Fire Protection ukon BFP-Ibajay nga nabugtaw eon lang sigon si Raymund Jasper Tubo, 20-anyos, unga it mag-asawang Ramon ag Maribel nga mabahoe eon ro kaeayo sa sueod it anang kwarto.
Ginasugid nga si Maribel hay sangka manugturo sa San Jose Elementary School.
Nasayuran nga totally burned ro konkretong baeay nga nag-umpisa ro sunog pasado alas-11:30 kabi-i ag gindeklarang fire out bandang alas-12:10 kaina it aga-aga.
Ginpahayag dugang nga ro nasambit nga electric fan hay bag-ong repair pa eamang.
Sa mayad nga swerte hay insigidang nakaguwa it baeay ro mag-asawa kaibahan ro andang daywang unga, apang owa it maskin anuman nga gamit nga nasalbar.
Ginatantiya nga naga-abot sa masobra sa P400,000 ro danyos it sunog.
Angot kara, ginlaygay nana sa mga pumueuyu nga magdoble dahan agud nga malikawan ro sunog eabi eon makaron nga fire prevention month.
