KALIBO, Aklan – Sangka 25-anyos nga eaeaki ro nagbigti matapos sigon nga mamuroblema sa pagkasamad it anang cellphone sa Brgy. Cabangila, Altavas, Aklan.
Ginkilaea it Altavas Police Station ro biktima nga si Raffy Clarite, owa it asawa ag residente it nasambit nga lugar.
Base sa report it pulisya, bandang ala-1:00 it hapon kat masapwan it anang ama ro bangkay it biktima nga nakabigti gamit ro nylon nga eubid sa baeayan sa sueod it anang kwarto.
Ginasugid nga bangud sa sobrang pagpamuroblema sa nasamad nga cellphone ro posibleng dahilan it pagpakamatay it biktima matapos nga matumod it mga otoridad nga antes ro suicide hay nagapalitik raya it anang ueo kon paalin nga masukot ro anang mga pautang at makaangkon it komunikasyon sa anang nobya nga nagatrabaho sa guwa it nasyon.
Haeos bilog nga adlaw man sigon nga nagkulong ro eaeaki sa anang kwarto.
Kat gintawag agud nga mag-ilabas hay owa raya nagsabat rason nga napilitan ro anang pamilya nga pwersahan nga buksan ro pwertahan.
Eubus ro kasubo it anang pamilya kat masapwan raya nga nakabigti ag owa eon it kabuhi.
Nasayuran nga pilang domingo antes ro insidente hay nagpamilin-bilin ro biktima sa ibang miyembro it anang pamilya partikular sa anang tiya nga kon sa siin gintugyan nana ro pagbantay sa anang nobya.
