KALIBO, Aklan—Bangud sa owa pagka-ilindihan tuga it kahilungon, sangka eaeaki ro nabun-an it anang kabarkada bandang alas-12:15 it aga-aga sa Barangay Pagsanjan, Banga.
Angot kara, nagpanawagan si P/Capt Benny Jones Mendoza, hepe it Banga Municipal Police Station sa suspek nga si Ivan Belarmino it banwa it Kalibo nga magsurender eon agud nga maayos ro andang problema it biktima nga si Marvin Ramintas, residente it nasambit nga lugar.
Sa mayad nga swerte suno kana nga bukon it masyadong grabe ro naangkon nga lastro ni Ramintas sa waea nga parte it kilid it anang eawas.
Insigida raya nga gindaea sa sangka ospital nga una eon sa mayad nga kahimtangan samtang ro suspek hay nagpaeagiw matapos ro insidente.
Sa pihak nga parte, ginpahayag it testigo nga si Macmac Francisco nga samtang naga-inuman sanda hay nagka-gulo ro magtimbang nga parte matapos nga sampaeon it biktima ro suspek.
Bangud sa pagka-pikon, nagpanaw si Belarmino sa pihak nga farm ag sa anang pagbalik hay may daea eon raya nga kutsilyo nga imaw ro anang ginbuno sa biktima.
Ginpahayag dugang nga paka-aga ro andang inuman nga nag-umpisa pasado alas-4:00 it hapon it Martes ag natapos it aga-aga it Miyerkules.
