KALIBO, Aklan—Bangud sa padayun nga pagtinaas it presyo it mga baeak-eon, ginapabaskog makaron it Department of Agriculture ro “Plant, Plant, Plant” nga programa it gobyerno kabulig ro mga local government units ukon LGU’s.
Suno kay James Earl Ogates, tagapaghambae it Department of Agriculture (DA) region 6 nga tuyo kara ni Secretary William Dar nga makaangkon it food sufficiency.
Mag-eowas kara, gina engganyo man it taeatapan ro pag-alaga it mga kasapatan sa likod it panimaeay.
Base suno kana sa naging experiensiya sa pagpanaeasa it covid 19 pandemic, kon owa ro produksyon it mga backyard farmers hay siguradong nakaangkon it mabahoe nga kakueangan sa pagkonsumo it komunidad.
Kaibahan sigon sa mga proyektong paga-pondohan sa idaeum it nasambit nga programa hay ro dugang nga pondo para sa pagbakae it paeay it National Food Authority ag iba pa kamana man ro pagpabaskog sa KADIWA ni Ani at Kita direct marketing program.
Suportado man kara ro urban agriculture ag community farming sa mga bakanteng lugar sa nagkaeain-eain nga subdivision.
Samtang, gina engganyo man nanda ro mga mangunguma nga mag-recycle it andang farm waste ag higku it mga kasapatan bilang fertilizer sa atubang it grabeng pagtaas it presyo it abono.
