KALIBO, Aklan—Bangud sa pagtaas it numero it kaso it coronavirus disease 2019 sa banwa it Malay ag isla it Boracay, nagpaguwa si Malay mayor Frolibar Bautista it executive order no. 14 series of 2021 angot sa mas hugut pang pagpatuman it health protocols.
Sa interview it Bombo Radyo Kalibo, ginpahayag ni mayor Bautista nga sambilog sa mga nakikitang rason it pagkalhit it virus hay ro pagiging kampante eon it mga tawo nga matsa owa eon nahadlok sa makamaeatay nga sakit.
Suno kana nga sa makaron nga buean it Marso hay may kabilugan nga 97 nga kumpirmadong kaso it COVID-19 sa andang banwa, masyadong maeayo sa datos ko buean it Pebrero.
Bangud kara, presenteng naka-Enhanced Community Quarantine (ECQ) ro bilog nga Barangay Balabag ag naka-surgical lockdown ro Purok 1 ag 7 it Barangay Manocmanoc hasta sa Abril 14.
Mag-eowas nga gin-extend it uman ro curfew umpisa alas-11 it gabi-i hasta alas-4 it aga-aga halin sa dating 1:00-am to 4:00-am, bawae anay ro mga mass ag non-essential gatherings kapareho it contact sports, apang ginapasugtan gihapon ro kite boarding sa mga turista.
Angot kara, gina engganyo ro mga kompaniya ag iba pang mga establisimento nga likawan ro face to face meetings sa baylo hay magpatigayon lang it virtual meetings.
Nagapabilin nga bawae ro religious gatherings sa barangay Balabag ag Manocmanoc.
Ginapasugtan ro pagpatigayon it misa sa barangay Yapak, apang limitado eamang sa 30% it seating capacity it chapel.
Required makaron sa mga turista ro pag-angkon it quarantine pass agud nga hilway nga makawarang sa bilog nga isla.
Gina-imbestigahan eon it mga otoridad ro ginakabig nga “superspreader” nga party nga ginpatigayon sa sangka bar sa isla it Boracay rason it gulping pagsirit it kaso.
Madumduman nga sangka turista ro nag-agto sa Boracay ko Marso 20 ag nagpositibo sa coronavirus disease (COVID-19) pagbalik it Metro Manila.
Ginasugid nga ro mga nagtambong sa party hay ginasugid nga nagtambong sa iba pang mga sumunod nga mga party, kun sa siin ko ulihi hay nakabatyag it sintomas it sakit, apang owa eagi nagpa-check-up.
Uman nga nag apela si mayor Bautista nga seryosohon ro pagsunod sa mga ginapatuman nga health ag safety protocols.
