KALIBO, Aklan — Patay ro sangka 33-anyos nga si Jeferson Berdandino matapos barilon it ananang kainuman sa Barangay Cabayugan, Malinao, Aklan.
Samtang naga inuman, nakaangkon sigon it mainitang diskusyon sanday Berdandino ag ro mga suspek nga sanday Basilio Ildisa, 46, ag Jay-ar Isuga, parehong residente it nasambitang lugar.
Sa imbestigasyon it Malinao Police Station, sangka tama it bala sa dughan ro insigidang gin kamatay ni Berdandino.
Owa eon raya nadaea sa ospital bangud insigidang namatay raya sa gin euntaran it insidente.
Nagpaeagyu ro suspek pagkatapos it krimen sakay it sangka motorsiklo nga gin maneho it sambilog pang suspek nga si Isuga.
Insigida man nga nag surrender sa punong barangay it Poblacion Malinao ro sambilog sa mga suspek nga si Ildisa nga aminadong nagsaeabtanan sanda ni Berdandino bangud sa kahilungon.
Naga padayun pa sa makaron ro imbestigasyon it kapulisan sa insidente ag posibling magpangatubang sa kasong murder ag pag eabag sa Republic Act 10591 ukon New Firearms Law ro suspek nga si Ildisa.
