KALIBO, Aklan—Nagapangatubang sa kasong murder ro sangka balot vendor matapos nga eab-on ro kaparehong vendor bandang alas-10:35 kabi-i sa Sitio Hagdan, Barangay Yapak, sa isla it Boracay.
Suno kay P/Major Don Dicksie de Dios, OIC it Malay Municipal Police Station nga patay eon kat maka-abot sa ospital ro biktimang si Janito Descalzo, 56-anyos, tubong Dao, Capiz tuga it naangkon nga mga madaeum nga igo it pag-eabu sa leog ag iba pang parte it eawas.
Samtang, insigidang naaresto ro suspek nga nakilaeang si Romeo Tibangin, 74-anyos, tubong Pangasinan ag parehong temporaryong naga-istar sa nasambit nga lugar.
Ginasugid nga nag-away ro daywa bangud sa presyuhan it balot, kun sa siin mas barato sigon ro baligya it biktima nga ginkaakig it suspek.
Base sa bo-oe it CCTV footage, gin-einabu it suspek ro biktima samtang nga nakatalikod ag nakapungko sa nakaparadang motorsiklo.
Dugang pa ni Major de Dios, narekober nanda ro gingamit nga sanduko sa baeay it suspek nga bag-ong ba-id pa rason nga posibleng ginpahauman gid ro paghimo sa krimen.
