KALIBO, Aklan—Patay ro sangka eaeaki matapos nga bun-on it anang manghud nga anang naka-away pasado alas-7:00 kabi-i it Miyerkules sa Sitio Mapait, Barangay Aranas, Balete.
Ginkilaea ni P/Major Bryan Alamo, hepe it Balete Municipal Police Station ro biktimang si Elderberto Resulta, residente it nasambit nga lugar.
Base sa imbestigasyon it kapulisan, nakaangkon it mainitan nga diskusyon ro magmaeanghud samtang sa inuman kasunod it pag-inaway it biktima ag anang asawa.
Nakisawsaw sigon ro suspek nga nakilaea kay Ronald Resulta, residente man it nasambit nga lugar sa away it mag-asawa bangud nga masyado eon raya nga nasangagan.
Owa it anuman nga rason hay gulping ginbo-oe it manghud ro anang bolo knife ag ginbuno sa anang magueang nga tinamaan sa anang dughan.
Matapos ro insidente, ginasugid nga mismong ro suspek man ro nagpangayo it tabang sa andang mga kaeapitbaeay agud nga makarga sa baroto ro anang magueang ag madaea sa Aklan provincial hospital.
Apang gindeklara man nga dead on arrival bangud sa mga naangkon nga lastro sa eawas partikular sa anang dughan.
Samtang, gindugang pa ni P/Major Alamo nga nagbalik sa inuman ro suspek kat maabutan it mga pulis sa anang baeay agud nga arestuhon.
Narekober man sa anang posisyon ro bolo knife nga ginatantiya nga may haba nga 13 pulgada nga may bakas pa it dugo nga ginapatihan nga gingamit sa krimen.
Ginasugid nga dati eon nga naeakot ro suspek sa insidente man it pagpangbuno, apang na-settle ro kaso ag owa eon naka-abot sa mga awtoridad.
Kilaea man sigon raya sa andang lugar nga maoy kon mahilong.
Sa kustodiya makaron it balete pnp ro suspek ag nakataeanang pagapasakaan it reklamong homicide.
