KALIBO, Aklan—Dead on Arrival ro sangka 31-anyos nga eaeaki matapos nga gin-eabo patay it kaugalingon nga tiyo kahapon sa Brgy. Navitas, Malinao.
Nakilaea ro biktima nga si Cris John Ingles samtang ro suspek ag mismong tiyo kara hay nakilaea kay Victorio Ingles Rimano, 46 anyos, parehong residente it nasambit nga lugar.
Base sa inisyal nga imbestigasyon it Malinao PNP, nag-adto ro biktima sa panimaeay it anang tiyo kung siin nakaangkon sanda it mainitan nga diskusyon.
Samtang nagapanaog sigon sa hagdan hay gulpi imaw nga gin-eabo it suspek.
Ginapatihan nga selos ro pinaka-motibo sa krimen.
Ro biktima hay gilayon pa nga gindaea sa sangka pribadong ospital sa banwa it Kalibo apang owa eon nakaabot it buhi matapos nga mag-angkon it fatal nga lastro sa anang likod.
Angot kara, ginpahayag ni Welihado Ingles, tiyo it biktima nga pursigido sandang magpasaka it kaso kontra sa suspek agud nga mataw-an it hustisya ro pagkamatay ni Cris John.
Ginklaru man nana nga owa it natabu nga pagpang-gubat ro biktima sa anang tiyo.
Ginasugid nga nag-agto ro biktima sa anang tiyo agud kunta nga mag-utang it kwarta matapos nga owa pa nakapadaea ro anang misis nga nagatrabaho sa manila.
Nasayuran nga ro suspek hay may dating kaso matapos nga eab-on ro nag-joke ukon naghinangae kana.
Base pa sa andang pag-usisa nga nagaselos ag nagaduda ro suspek sa anang misis ag gumankon matapos nga haeos sang domingo eon nga owa nagapasugot nga maghulid kana ro anang asawa agud nga indi eon madugangan ro andang unga.
Samtang, ro suspek hay boluntaryo nga nagsurrender sa kapitan it Brgy. Kinalangay Nuevo kung siin presente eon raya nga una sa kostudiya it mga otoridad.
Depensa nana nga haeos tatlong adlaw eon nana nga ginasubaybayan ro gumankon ag pamatyagan nana hay gina-interesan kara ro anang asawa.
Nakataeana raya nga pagapasakaan it kasong homicide.
Sa pihak nga parte, ginkumpirma ni Navitas punong barangay Napoleon Iledan nga may nervous breakdown ro suspek rason nga paiba-iba ro anang pahayag ag nagiging paranoid.
Apang sa anang pagkasayod hay owa it may nagapatunga nga away sa tunga it mag-tiyo.
