BALITA Espesyal—Sangka owa eon ginpangaeanan nga eaeaki halin sa Jiangsu Province sa China ro nagpaidaeom sa maselan nga gastroscopic operation agud nga mabuoe sa anang tiyan ro sangka toothbrush matapos nga aksidenteng nana rayang matueon.
Suno sa eaeaki, kueang imaw tueo kat matabo ro insidente rason nga owa imaw sa anang sarili samtang naga-toothbrush.
Sa sobrang kadueoygon, owa kara napan-uhan nga natueon eon nana ro anang toothbrush.
Ginhana pa sigon nana raya nga bue-on halin sa anang tutunlan gamit ro anang tudlo apang mas pa nana rayang natueod pasueod bangud sa madanlog kara nga handle.
Maskin nga bukon it maayos ro anang pamatyagan sa anang tutunlan ag tiyan, nakamaneho pa gihapon imaw paadto sa pinakamaeapit nga ospital ag insigidang nagpaidaeom sa X-ray.
Pagkatapos kara, ginpahaum eon imaw sa emergency gastroscopic operation.
Owa naging madali para sa mga doktor it department of gastroenterology ro operasyon rason nga inabot raya it pilang oras antes eubusan nga nabuoe ro toothbrush.
Suno kay Dr. Wang Jianrong, head it department of gastroenterology it Taizhou Fourth People’s Hospital, tama ro ginhimo it eaeaki nga nag-adto eagi sa ospital bangud kung ginpabuhay pa nana raya, makaangkon eon mabahoe nga kahalitan ro anang esophagus.
Sa makaron, una eon sa maayos nga kahimtangan ro nasambit nga eaeaki.
