KALIBO, Aklan—Nakalista it ap-at nga panibag-ong kaso it Covid-19 ro banwa it Altavas.
Sandig sa ginpaguwa nga official statement it Altavas Municipal Health Office, raya hay ginakaeakipan it mga locally stranded individual ukon LSI’s.
Base sa impormasyon, nakabaton it email ro nasambit nga taeatapan nga may ap-at nga LSI’s nga nagpositibo sa deadly virus base sa RT-PCR test result nga ginpaguwa it Western Visayas Medical Center Department of Pathology, Sub National Laboratory.
Antes pa man kara, pag-abot sigon it nasambit nga mga LSI’s sa lugar hay insigida sandang ginbutang sa barangay isolation ag ko ulihi hay gintransfer sa Municipal Ligtas Covid Center it banwa.
Ro mga covid-19 patient hay nagapabilin nga asymptomatic ukon uwa it sintomas it nasambit nga sakit.
Angot kara, uman nga nagpadumdom ro health officials nga kinahang-ean isakabuhi ro BIDA ukon bawal ro uwa it face mask; isanitize ro mga alima; dumistansya it sang metro ag sayuron ro minatuod nga impormasyon agud nga maging eowas ro kaugalingon maging ro bilog nga pamilya kontra sa deadly virus.
