Nagplastar it border control checkpoints sa banwa it Banga matapos makarecord it kaso it African swine fever ukon ASF sa brgy. Arcanghel Sur sa banwa it Balete.
Suno kay Elmar Estanislao, Municipal Agriculturist Officer sa banwa it Banga nga nagplastar sanda it border checkpoint sa brgy. Sebaliw, Toralba, ag sa brgy. Venturanza.
Nagpueong eon sigon si Municipal Mayor Noel Redison kaibahan ro mga brgy. Captains ag agriculture office nahanungod sa mga preventive mitigations bangud sa kaso it ASF.
Magaconduct it visual checkinging ro mga biosafety officers sa mga status it mga animal products partikular ro baboy kaeakip sa mga naghalin sa banwa it Balete base sa ginpaguwa nga proclamation.
Ginpahayag dugang nga ginarequire ro mga meat traders nga magsecure it barangay clearance sa kada barangay nga ginaboe-an sa banwa it Banga.
Dugang pa kara nga indi pwede magbo-oe it barangay clearance sa iba nga banwa.
Samtang, ginklaro man it opisyal nga owa man ginabawae ro pagpaguwa it baboy sa nasambit nga banwa.
Apang bawae ro pagpasueod ag pagpaguwa it baboy sa brgy. Sebaliw base sa EO nga ginpaguwa.
Sa pihak kara, nagpahayag si Mayor Redison sa mga kapitan nga mag-organisa it border checkpoint nga sakop it hurisdiksiyon it kada barangay ag sa barangay clearance para ma-monitor ag maregulate ro nasambit nga perwisyo.
Mag-eowas kara, may mga instruction man nga igatuman para sa mga mantantsero nga indi magbino-oe it baboy sa guwa it banwa.
Kasunod sa ginpaguwa nga executive order, gin-insister man ni Estanislao nga indi eon mag-baeon it suea nga baboy hay raya iga-confiscate ag iga-dispose.
