Kalibo Aklan ———Nakalista ro Provincial Health Office (PHO)-Aklan it 56 nga aktibong kaso it COVID- 19 sa banwa it Banga .
Raya hay matapos nga makalista it pito nga bag-ong kumpirmadong kaso kun sa siin 6 kara ro naka-facility quarantine .
Suno kay Donnalyn Siyambio , tagapaghambae it Banga Inter-agency Task Force nga humampak eon sa 224 ro kabilugan nanda nga kaso umpisa nga mag-eupok ro pandemya sa nasyon .
Kaabuan sigon sa bag-ong kaso hay high risk contact it mga nauna eon nga nagpositibo sa sakit ag nakaangkon it sintomas rason nga ginpaidaeum sa RT PCR test .
Nagapadayun man sigon ro contact tracing agud nga matapna eon ro pagkalhit it virus .
Samtang, gindugang pa ni Siyambio nga pila sa mga vendors ag nagapanindahan sa Banga Public Market ro nasampolan ag ginpapanaugan it multa sa ginpatuman nga mas hugut nga quarantine rules.
Raya hay kasunod it pag-classify it DOH Region 6 sa Banga bilang high risk area kaibahan ro Balete ag Altavas sa probinsiya it Aklan .
Samtang, gindugang pa ni Siyambio nga masobra sa 400 nga A1 group ro natigayon nanda nga mabakunahan ag masobra sa 100 nga A2 ukon mga senior citizens .
Aminado imaw nga ulihi eon sanda sa andang vaccination roll out bangud sa kakueangan it staff nga magapatigayon it pagbakuna bangud pila sa mga raya hay na-quarantine ag ro iba hay masako sa contact tracing.
