Kalibo Aklan ——–Nakalista it pinakaunang kaso it Coronavirus Disease 2019 (COVID-19) ro banwa it Batan.
Base sa ginpagguwa nga official statement ni Batan Mayor Rodel Ramos, sangka 39-anyos nga eaeaking OFW ag negosyante ag residente it Brgy. Napti ro nagpositibo sa sakit.
Ginasugid nga symptomatic ro pasyente kung sa siin naka-isolate eon raya makarun sa Aklan Training Center Quarantine Facility.
Suno kay Dr. Cornelio Cuatchon Jr. it PHO-Aklan, ko Agosto 25 hay nagpa-medical ro pasyente bangud ginapatawag eon raya it anang kompanya sa Manila ag dikara hay nag-inquire imaw angot sa RT-PCR test kung siin gin-abisuhan imaw it doctor nga sa Qualimed Hospital sa probinsya it Ilo-ilo imaw magpaidaeom it nasambitang test.
Ko Agosto 26 hay nag-adto imaw idto ag nagguwa ro anang resulta ko Agosto 28 nga positibo imaw sa sakit.
Ginpahayag dugang nga nakalista it kapin sa 22 ka mga high risk contacts it pasyente sa ginpatigayun nga contact tracing.
Ginakaeakipan raya it waeo ka mga health care worker sa Batan Rural Health Unit (RHU) ag 14 sa mga household.
Suno pa kay Dr. Cuatchon nga igapaidaeom sa lockdown ro Sitio Centro, Brgy. Napti sa nasambitang banwa sa sueod it limang adlaw umpisa makarun nga adlaw it Dominggo, Agosto 30 hasta Setyembre 3, 2020 kamana man nga magapagguwa it sambilog nga quarantine pass sa kada household.
Kaangot kara, temporaryo nga iga-sarado ro RHU-Batan matapos nga makasalamuha it pasyente waeo ka mga staff kara.
Nagpanugyan man si Dr. Cuatchon sa publiko nga padayun nga sundon ro pilang minimum health protocol agud nga makalikaw sa makataeapon nga sakit.
Sa kabilugan may 31 nga kaso eon it COVID-19 ro Aklan.
