KALIBO, Aklan—Nakalista it 41 nga mga aktibong kaso it Coronavirus Disease 2019 ukon COVID-19 ro banwa it Buruanga.
Suno kay Buruanga Mayor Concepcion Labindao, raya ro rason kun ham-an nabutang sa critical level ro andang munisipalidad.
Ro nasambit nga classification hay base sa resulta it Community Quarantine Decision Matrix it Department of Health (DOH) Center for Health Development sa sueod it daywang dominggo.
Ro ginbasehan sigon kara hay ro numero it populasyon apisar nga sangkiri hay mataas man ro growth rate ukon average daily attack rate it mga kaso it COVID-19 sa andang banwa.
Pag-istorya ni Labindao, nag-umpisa eamang sa sambilog ro andang kaso kun siin namatay man ro pasyente.
Halin sa 58 nga nailistang high risk contact, 20 sigon sa mga raya ro nagpositibo.
Bangud kara, gindesisyonan it lokal nga gobyerno nga ipaidaeom sa surgicial lockdown ro Brgy. Alegria agud nga makontrol ro pagkalhit it virus.
Agud nga malikawan ro pagguwa it mga apektadong pumueoyo, nagtao sigon ro LGU it mga food pack sa kada pamilya nga nakapaidaeom sa lockdown.
Dugang pa ni Labindao nga ro 41 nga aktibong kaso it sakit hay puro asymptomatic ag magpamilya.
Ginasugid nga naga-ililiping ro mga panimaeay sa nasambit nga lugar rason nga naging madasig ro pagtaeapnan.
Angot kara, kapin sa 100 nga mga indibidwal pa sigon ro nakataeana nanda nga ipaidaeom sa swab test.
Ginpasiguro man it alkalde nga ginahimo nanda ro tanan agud nga makontrol ro sitwasyon.
Nag-apela man raya sa publiko nga padayun nga magsunod sa health and safety protocols agud nga indi eon magkalhit pa ro COVID-19 infection.
