KALIBO, Aklan—Ginakasubo it sangguniang bayan nga ginakabig makaron ro banwa it Kalibo bilang infected zone bangud sa Afican Swine Fever ukon ASF.
Ginpaathag ni SB member Atty. Christine Candelario-Dela Cruz, chairman it committee on agriculture nga sa pihak it ginhimo nga mga tikang it lokal nga gobyerno hay nakasueod gihapon ro ASF sa banwa.
Partikular ro pagtukod it mga border checkpoints sa ap-at nga mga istratihikong lugar para kunta sa ASF prevention.
Nailista ro unang kaso it ASF sa Barangay Caano, Kalibo ag madasig raya nga nagkalhit sa iba pang mga barangay.
Sa kamatuoran suno kana hay nag abot sa kapin sa 69 nga baboy ro ginpaidaeum sa culling ukon pagpatay nga ginaeakipan it 55 halin sa caano ag 14 halin sa sangka farm sa Barangay Pook kun sa siin mismong ro tag-ana kara ro naghinyu nga patyon ro anang mga alagang baboy.
Sa pihak nga parte, pilang blood samples pa halin sa limang barangay ro ginpadaea sa Department of Agriculture Region 6 para sa testing.
Sa makaron hay ginmandu sigon ni Mayor Juris Sucro ro pag activate sa barangay risk reduction task force bangud nga makabig eon raya nga kalamidad.
Welcome ag ginkalipay man sigon nanda ro pagpaidaeum sa Aklan sa state of calamity bangud sa ASF outbreak agud nga magamit nanda ro quick response fund.
Apela nanda makaron sa mga hog raisers nga i-quarantine ukon limitahan ro movement it andang mga baboy nga una eang sa andang natungdan nga barangay ag kon makitaan it anuman nga sintomas it virus hay i-report eagi sa Municipal Agricultural Office ukon sa Office of the Provincial Veterinarian ag indi magmato-mato sa pag eubong it mga alagang namatay.
Matapna eamang sigon ro virus kon nagabueuligan ro tanan.
Gindugang pa ni Atty. Dela Cruz nga may benepisyo nga mabo-oe ro mga hog raisers kon naka insured ro andang alagang baboy sa Philippine Crop Insurance Corporation ag posibleng ayuda kon nagpalista sa andang natungdan nga barangay.
Ginaduso man nanda nga taw-an it financial assistance ro mga naging biktima it ASF.
