KALIBO, Aklan – Ginpaidaeum eon sa state of calamity ro banwa it Kalibo matapos nga ipasa ro resolution bangud sa epekto it pagpanaeasa it el nino phenomenon.
Raya ro ginkumpirma ni Sangguniang Bayan Member Ronald Marte.
Sa ginpatigayon nga session it sangguniang bayan, gin-aprubahan ro nasambit nga resolusyon bilang sabat sa panawagan ni Mayor Juris Sucro ag bilog nga Municipal Disaster Risk Reduction and Management Council ukon MDRRMC.
Nakaangkon suno kana it kahalitan ro grabeng init sa mga mangunguma ag mangingisda kamana man sa taeatapan it Metro Kalibo Water District ukon MKWD kun sa siin naghina ro supply it tubi tuga it pagnaba it level it tubi sa Aklan River.
Gin-rekomenda raya it MDRRMC base sa datos nga nailista it Municipal Agriculture Office, pamunuan it MKWD ag iba pang natungdan nga ahensiya it gobyerno.
Dugang pa ni Marte nga gin-rekomenda ni Mayor Sucro ro deklarasyon it state of calamity agud nga mataw-an it ‘go signal’ ro LGU nga magamit ro parte it local calamity fund para sa mas maeapad nga pagpaabot it bulig sa mga eubus nga naapektuhan it grabeng tag-init.
Pwede man sigon nga makapangayo kara it assistance sa department of agriculture ag Local Water Utilities Administration ukon LWUA.
