KALIBO, Aklan—Ginkalipay ni Kalibo mayor Emerson Lachica nga cleared eon sa coronavirus disease ukon COVID-19 ro 789 nanda nga persons under investigation ukon PUI ag persons under monitoring ukon PUM sa andang natungdan nga mga quarantine period.
Nagaeaum ro alkalde nga maga-dere-deretso eon raya agud nga maibalik eon sa normal ro pagpangabuhi sa oras nga mabawi ro ginapatuman nga enhanced community quarantine.
Raya hay nagakahueugan nga owa sanda nagapakita it anumang sintomas sa nagtaliwan nga daywang domingo ag ro pilang PUIs man hay nag-negatibo sa COVID-19 test.
Gin-anunsyo pa it alkalde nga sa makaron hay una sa mayad nga kahimtangan ro tatlong nagpositibo sa sakit sa banwa it Kalibo, kun sa siin hay ginahueat eon lang ro andang confirmatory result it covid test halin sa Western Visayas Medical Center sa siyudad it Iloilo.
Sa pihak nga parte, kasunod it paandam ni Pangueong Rodrigo Duterte nga paga-arestuhon ro mga alkalde nga mapas-eawan nga mapatuman ro social distancing, ginmandu ni mayor Lachica kay market master Abel Policarpio ag mga kapulisan nga hugut raya nga bantayan eabi eon sa sueod it Kalibo public market.
Sa pihak nga parte, padayon nga naga-apela si mayor Lachica sa publiko nga magpabilin anay sa sueod it panimaeay samtang owa pa natapos ro ECQ.
Raya sigon ro rason kon ham-an nga mas pang ginhugtan ro border control checkpoint it kada banwa agud nga malimitahan ro pagpinanaw it mga tawo.
Obligado sigon ro mga pumueuyu nga may transaksyon sa banwa it kalibo nga magbo-oe anay it certification sa andang natungdan nga mga mayor agud nga masayuran ro purpose it andang pagsueod sa kalibo.
