KALIBO, Aklan—Nagtuga it kakueba ag pagkabaeaka sa mga pumueoyo it banwang Libacao ro pagpositibo sa Coronavirus Disease 2019 ukon COVID-19 it sambilog sa andang kasimanwa kahapon, Nobyembre 17.
Suno kay Dr. Aldrin Fernandez it Municipal Health Office (MHO)-Libacao, nga ro pasyente hay sangka 65-anyos nga eaeaki ag kauna-unahang local case nga nailista sa andang banwa bangud owa sigon raya it naging history of travel sa mga high risk nga lugar ukon exposure sa sangka COVID-19 positive.
Raya sigon ro pang ap-at nanda nga kaso kung siin ro tatlo nga nauna eon nga nagpositibo hay fully-recovered eon sa deadly virus.
Ginapahayag nga ko adlaw it Sabado hay nakabatyag ro pasyente it pila sa mga sintomas kapareho it ubo ag eagnat rason nga nagpa-checkup imaw ag gin-abisuhan man it nagtatap nga doktor nga magpa-admit sa ospital.
Ko Nobyembre 16 it agahon sigon raya ginbue-an it swab test ag dikato natueopangdan nga nagpositibo imaw sa sakit.
Nagpatigayun eon man sigon sanda it contact tracing sa mga makabig nga high risk contact it pasyente.
Sa makaron hay naga-abot eon sa kabilugan nga 192 ro kaso it COVID-19 sa probinsya it Aklan kung siin 22 pa ro nagapabilin nga active cases samtang 9 ro nailistang namatay.
