KALIBO, Aklan—Sa pihak nga naabot eon it banwa it malay ro herd immunity kontra sa COVID-19, nagapadayun sa gihapon ro andang bakunahan.
Raya ro ginpahayag ni Dr. Athena Magdamit, Malay municipal health officer.
Suno kana nga ro herd immunity hay nagatumod sa populasyong kinahangean nga mabakunahan kontra COVID-19 agud nga maging immune ro mabahoe nga numero it mga residente it sangka lugar.
Nasayuran nga ro nasambit nga banwa ro top performer sa vaccination roll-out sa bilog nga probinsiya it Aklan.
Naga-abot sa 106.3% it andang kabilugan nga populasyon ro natigayon eon nga mabakunahan.
Gindugang pa ni Dr. Magdamit nga bangud sa pagbueuligan it LGU, stakeholders ag iba pang ahensiya it gobyerno eabi eon sa isla it Boracay rason nga naeampasan ro goal nga herd immunity.
As of January 17, naga-abot sa 39,412 ro nakabaton it unang dose base sa datos it Provincial Health Office.
Pila sa andang estratehiya hay ro pagbutang it maabu nga mga vaccination sites partikular sa barangay Caticlan ag isla it Boracay agud nga maging accessible sa tanan eabi eon ro mga residente nga naga-istar sa maeayo nga lugar.
Gusto sigon nanda nga tanan nga mga eligible nga residente sa banwa it Malay hay mabakunahan.
Sa pihak nga parte, nagapadayun sigon ro pagtau it booster shots sa mga tourism workers sa isla sa pakikipagbueuligan man it Department of Tourism.
