KALIBO, Aklan—Owa eon it nailistang Person’s Under Monitoring (PUM) ag Person’s Under Investigation (PUI) sa banwa it Numancia.
Sa report it Rural Health Unit it nasambit nga banwa ko Abril 9, 2020, natapos eon ro 14-diyas nga quarantine procedure nanda kun sa siin nagnegatibo ro mga raya sa coronavirus.
Ginpahayag dugang nga ro tatlong PUI nga andang nailista hay cleared eon kamana man ro 346 nga PUM.
Base sa sueundanan it Department of Health (DOH), matumod nga PUI ro sangka personalidad kun may eagnat nga 38 degree celsius, may ubo ag sip-on, may travel history sa mga nasyon ukon probinsiya nga apektado it COVID-19 sa nagtaliwan nga 14 diyas ag nakaangkon it exposure sa mga tawong positibo sa sakit.
Makabig man nga PUM kun ro sangka personalidad maskin nga owa it sintomas it eagnat, ubo ag sip-on apang nagbiyahe sa nasyon ukon lugar nga apektado it COVID-19 sa nagtaliwan nga 14 diyas.
Pwede man nga owa it sintomas it eagnat, ubo ag sip-on apang naghalin sa apektadong mga nasyon.
Sa pihak kara, padayun nga nagpadumdum ro RHU numancia sa andang mga kasimanwa nga magbilin nga mapagbantay, pirmeng maghugas it alima, mag-observe it social distancing ag magpabilin anay sa sueod it baeay hasta nga matapos ro enhanced community quarantine sa bilog nga aklan bangud nga may una pang nailistang mga kaso sa ibang mga banwa.
Ginpasaeamatan man it LGU-Numancia ro tanan nanda nga mga frontline workers nga ginaeakipan it Health, Emergency, Planning, Logistics, Peace and Order, BHERTS, Barangay Officials ag mga miyembro it andang inter-agency task force sa andang bilog nga suporta.
