KALIBO, Aklan–Ginpaidaeum it Sangguniang Bayan it Hamtic ro andang banwa sa state of calamity bangud sa kumpirmadong kaso it African swine fever (ASF).
Ginpahayag ni Antique Provincial Veterinary office head it Public Health Division nga si Dr. Marco Rafael Ardamil nga ro deklarasyon hay ginhimo matapos nanda nga mabaton ro kumpirmasyon it ASF halin sa Department of Agriculture-Regional Animal Disease Diagnostic Laboratory.
Suno kana nga owa pa imaw it impormasyon kun pila ro igataeana nga calamity fund para mabuligan ro mga hog raisers, apang raya hay magiging indemnification bangud nga gin umpisahan eon it OPVET ag Municipal Agriculture Office ro depopulasyon it 30 nga infected nga baboy sa University of Antique (UA) sa Hamtic.
Ro UA Hamtic, nga nahamtang sa Barangay Guintas, hay nagatanyag it mga kurso sa kolehiyo nga may major sa Animal Science ag Crop Science rason nga naga alaga sanda it masobra sa 100 nga mga baboy bilang kaparte it leksyon it andang mga estudyante.
Nagahinyu man sigon sanda sa Department of Agriculture (DA) Regional Office 6 it dugang nga manpower ag test kits bangud nga kinahangean man nanda nga mag-depopulate sa iba pang barangay nga may kaso it ASF.
Ginpahayag ni DA Regional Executive Director Jose Albert Barrogo, nga nakikipag-coordinate eon sanda para sa mga test kits.
Gindugang pa ni Barrogo nga nagatau man sanda it teknikal nga bulig sa Antique, partikular sa Hamtic LGU, nga gina-obra ro tanan agud nga matapna eagi ro virus.
Ginpahayag it opisyal it DA nga sa kumpirmadong kaso it ASF sa Hamtic, Antique, tanan nga an-um nga probinsya sa Western Visayas hay nasudlan eon it virus.
Sa pihak nga parte, ginpahayag man ni Hamtic Municipal Agriculture Officer Isidro Ramos nga hasta sa Hunyo 21 hay may una eon nga 1,787 hog mortalities sa 28 barangay it munisipyo.
Ginpahayag man nana nga ro kabilugan nga kahalitan nga naangkon bangud sa hog mortality hay P16,977,500 pesos nga gin report it 362 apektadong hog raisers.
Kaibahan ro OPVET ag ro augmented personnel halin sa DA, magapatigayon sanda it test and destroy scheme kun sa siin ro mga healthy nga baboy hay igabueag sa mga infected agud nga pwede pa raya nga katayon ag ibaligya sa sueod it barangay.
