KALIBO, Aklan—Ginsuspinde ni Banga mayor Erlinda Maming ro daywang tawuhan it Banga Auxiliary Police ukon BAP nga naispatan nga magka-angkas sa motorsiklo nga sangka pag-eabag sa ginapatuman nga protocol it Inter-Agency Task Force on Emerging Infectious Diseases ukon IATF-EID.
Suno kay Sangguniang Bayan member Jocel Rata nga tuyo it nasambit nga tikang nga matur-an it leksyon ro mga raya.
Owa eon man ginsapubliko it opisyal ro pangaean it daywang ginsuspinde.
Samtang, owa sigon it kasiguraduhan kon hin-uno makabalik sa trabaho ro mga raya.
Madumduman nga ro daywang BAP member hay ginpatawag ni mayor Maming ko nagtaliwan nga adlaw, kung sa siin, andang ginpaathag nga nagresponde sanda sa natabu nga vehicular accident ag nakataeanang iga-impound ro motorsiklo nga eakot.
Naduea sigon sa andang isip nga mag-angkas sa motorsiklo nga tiempo man nga nalitratuhan it sangka netizen nga insigidang gin-post sa social media ag naging viral.
Ginpaathag pa kanda nga trabaho it pulis ro pagresponde sa mga aksidente ag dapat nga maga-alalay eamang sanda sa operasyon.
Gindugang pa ni SB member Rata nga maid-id nanda nga paga-rebisahon sa andang session ro mga kwalipikasyon sa pagaboe-on nga BAP members kamana man ro pag-edukar kanda sa andang papel sa pagpatuman it ordinansa sa traffic rules and regulations.
Madumduman nga waea-tuo ro pagbatikos sa mga BAP members bangud sa a gina-alegar nga pagiging arogante sa pagsita sa mga violators ag sobra kataas nga pagsukot it multa.
Mag-eowas kara, owa sigon nagatau ro mga raya it warnings sa mga 1st offenders ag may kahigayunan nga bukon it patas sa pag-isyu it citation ticket.
Sa pihak kara, ginakilaea ag ginadayaw sigon nanda ro hugod it mga BAP members partikular ro pagbantay sa daeagan it trapiko.
